இத்தலம் நடுநாட்டிலுள்ளது.

சுவாமிபெயர் - பழமலைநாதர்.
தேவியார் - பெரியநாயகியம்மை.

249

பொன்செய்த மேனியினீர் புலித் தோலை அரைக்கசைத்தீர் முன்செய்த மூவெயிலும் மெரித் தீர்முது குன்றமர்ந்தீர் மின்செய்த நுண்ணிடையாள் பர வையிவள் தன்முகப்பே என்செய்த வாறடிகேள் அடி யேன்இட் டளங்கெடவே.

7.025.1

பொன்னைப்போலும் திருமேனியை உடையவரே, புலியினது தோலை அரையில் உடுத்தவரே, நன்கு செய்யப்பட்ட மூன்று மதில்களையும் முன்பு எரித்தவரே, திருமுதுகுன்றத்தில் விரும்பி இருப்பவரே, அடிகளே, மின்னல் போலும் நுண்ணிய இடையை யுடையவளும், 'பரவை' என்னும் பெயரினளுமாகிய இவள் முன்னே, அடியேனது துன்பங் கெடுதற்கு நீவிர் என் செய்தவாறு!

250

உம்பரும் வானவரும் முட னேநிற்க வேயெனக்குச் செம்பொனைத் தந்தருளித் திக ழும்முது குன்றமர்ந்தீர் வம்பம ருங்குழலாள் பர வையிவள் வாடுகின்றாள் எம்பெரு மான்அருளீர் அடி யேன்இட் டளங்கெடவே.

7.025.2

எம் பெருமானிரே, நீர், முன்பு, வானத்தில் உள்ள தேவர்களும், அவர்கட்குமேல் உள்ள 'அயன், மால்' என்பவர்களும் கண்டுநிற்க எனக்குச் செம்பொன்னைக் கொடுத்து, விளங்குகின்ற திருமுதுகுன்றத்தில் எனக்குத் துணையாய் இருந்தீர்; இப்பொழுது, மணம் பொருந்திய கூந்தலையுடையவளும், 'பரவை' என்னும் பெயரினளும் ஆகிய இவள் பொருள் முட்டுப்பாட்டினால் மெலி கின்றாள்; அது பற்றிய அடியேனது துன்பங் கெடுமாறு அருள்செய்தல் வேண்டும்.

251

பத்தா பத்தர்களுக் கருள் செய்யும் பரம்பரனே முத்தா முக்கணனே முது குன்ற மமர்ந்தவனே மைத்தா ருந்தடங்கண் பர வையிவள் வாடாமே அத்தா தந்தருளாய் அடி யேன்இட் டளங்கெடவே.

7.025.3

எப்பொருட்கும் பற்றுக்கோடானவனே, அடியார்களுக்கு அருள் பண்ணுகின்ற மேலான பொருட்கும் மேலானவனே, இயல்பாகவே பாசத்தின் நீங்கினவனே, மூன்று கண்களையுடையவனே, திருமுதுகுன்றத்தில் விரும்பி இருப்பவனே, என் அப்பனே, மை தீட்டப்பட்டு அழகு நிறைந்த பெரிய கண்களையுடைய. 'பரவை' என்னும் பெயரினளாகிய இவள், பொருள் முட்டுப்பாட்டினால் வருந்தாதபடி, அடியேனது துன்பங்கெடுமாறு செம்பொன்னைத் தந்தருள்.

252

மங்கையொர் கூறமர்ந்தீர் மறை நான்கும் விரித்துகந்தீர் திங்கள் சடைக்கணிந்தீர் திக ழும்முது குன்றமர்ந்தீர் கொங்கைநல் லாள்பரவை குணங் கொண்டிருந் தாள்முகப்பே அங்கண னேயருளாய் அடி யேன்இட் டளங்கெடவே.

7.025.4

உமையை ஒரு பாகத்தில் விரும்பி வைத்தவரே, வேதங்கள் நான்கினையும் விரித்து அருளிச்செய்து அதனை அறநூலாக விரும்பியவரே, சடையின்கண் சந்திரனை அணிந்தவரே, விளங்குகின்ற திருமுதுகுன்றத்தில் விரும்பி இருப்பவரே, கண்ணோட்டம் உடையவரே, தனங்கள் அழகியாளும், யான் சொல்லியதைச் சொல்லியவாறே கருதும் தன்மை உடையவளும், 'பரவை' என்னும் பெயரினளுமாகிய இவள் முன்னே, அடியேனது துன்பங் கெடுமாறு அருள்புரிதல் வேண்டும்.

253

மையா ரும்மிடற்றாய் மரு வார்புர மூன்றெரித்த செய்யார் மேனியனே திக ழும்முது குன்றமர்ந்தாய் பையா ரும்மரவே ரல்கு லாளிவள் வாடுகின்றாள் ஐயா தந்தருளாய் அடி யேன்இட் டளங்கெடவே.

7.025.5

மைபோலப் பொருந்திய கண்டத்தை யுடையவனே, பகைவரது மூன்று ஊர்களை எரித்த, செவ்விய அழகு நிறைந்த திருமேனியையுடையவனே, விளங்குகின்ற திருமுதுகுன்றத்தில் விரும்பி இருப்பவனே, தலைவனே, பாம்பினிடத்துப் பொருந்தியுள்ள படம்போலும் எழுச்சியையுடைய அல்குலினையுடைய பரவையாகிய இவள் பொருளின்றி வருந்துகின்றாள்; ஆதலின் அதுபற்றிய அடியேனது துன்பங்கெடுமாறு, செம்பொன்னைத் தந்தருள்.

254

நெடியான் நான்முகனும் மிர வியொடும் இந்திரனும் முடியால் வந்திறைஞ்ச முது குன்றம் அமர்ந்தவனே படியா ரும்மியலாள் பர வையிவள் தன்முகப்பே யடிகேள் தந்தருளீர் அடி யேன்இட் டளங்கெடவே.

7.025.6

திருமாலும், பிரமனும், சூரியனும், இந்திரனும் வந்து தலையால் வணங்கும்படி, திருமுதுகுன்றத்தில் விரும்பி இருப்பவனே, தலைவனே, பெண்மைப் பண்புகள் நிறைந்த இயல்பினை உடையவளும், "பரவை" என்னும் பெயரினளுமாகிய இவள் முன்னே, அடியேனது துன்பங் கெடுமாறு செம்பொன்னைத் தந்தருள்.

255

கொந்தண வும்பொழில்சூழ் குளிர் மாமதில் மாளிகைமேல் வந்தண வும்மதிசேர் சடை மாமுது குன்றுடையாய் பந்தண வும்விரலாள் பர வையிவள் தன்முகப்பே அந்தண னேயருளாய் அடி யேன்இட் டளங்கெடவே.

7.025.7

கொத்துக்கள் பொருந்திய சோலைகள் சூழ்ந்த குளிர்ந்த பெரிய மதில்கள் மேலும், மாளிகைகள் மேலும் வந்து தவழ்கின்ற சந்திரன் பொருந்திய சடையினை உடைய பெரிய திருமுது குன்றத்தையுடையவனே, அந்தணனே, பந்து பொருந்திய விரலை உடையவளும், 'பரவை' என்னும் பெயரினளும் ஆகிய இவள் முன்னே, அடியேனது துன்பங் கெடுமாறு அருள்பண்ணுவாய்.

256

பரசா ருங்கரவா பதி னெண்கண முஞ்சூழ முரசார் வந்ததிர முது குன்ற மமர்ந்தவனே. விரைசே ருங்குழலாள் பர வையிவள் தன்முகப்பே அரசே தந்தருளாய் அடி யேன்இட் டளங்கெடவே.

7.025.8

மழுப் பொருந்திய கையை யுடையவனே, பதினெண் கணங்களும் புடை சூழவும், முரசு அணுக வந்து முழங்கவும் திருமுதுகுன்றத்தில் விரும்பி இருப்பவனே, எல்லா உலகிற்கும் அரசனே, நறுமணம் பொருந்திய கூந்தலையுடையவளும், 'பரவை' என்னும் பெயரினளும் ஆகிய இவள் முன்னே, அடியேனது துன்பங்கெடுமாறு செம்பொன்னைத் தந்தருள்.

257

ஏத்தா திருந்தறியேன் இமை யோர்தனி நாயகனே மூத்தாய் உலகுக்கெல்லா முது குன்ற மமர்ந்தவனே பூத்தா ருங்குழலாள் பர வையிவள் தன்முகப்பே கூத்தா தந்தருளாய் கொடி யேன்இட் டளங்கெடவே.

7.025.9

தேவர்கட்கு ஒப்பற்ற தலைவனே, எல்லா உயிர்கட்கும் மூத்தவனே, திருமுதுகுன்றத்தில் விரும்பி இருப்பவனே, கூத்துடையானே, உன்னை யான் பாடாமல் இருந்தறியேன்; ஆதலின், மலர்கள் மலர்ந்து பொருந்துகின்ற கூந்தலையுடையவளும், 'பரவை' என்னும் பெயரினளும் ஆகிய இவள்முன்னே, அடியேனது துன்பங்கெடுமாறு செம்பொன்னைத் தந்தருள்.

258

பிறையா ருஞ்சடையெம் பெரு மானரு ளாயென்று முறையால் வந்தமரர் வணங் கும்முது குன்றர்தம்மை மறையார் தங்குரிசில் வயல் நாவலா ரூரன்சொன்ன இறையார் பாடல்வல்லார்க் கௌ தாஞ்சிவ லோகமதே.

7.025.10

தேவர்கள் பலரும் தம் வரிசைக்கேற்ப முறையாக வந்து வணங்கும் திருமுதுகுன்றரை, அந்தணர் தலைவனும், வயல்களையுடைய திருநாவலூரினனும் ஆகிய நம்பியாரூரன், 'பிறை பொருந்திய சடையினையுடைய எம்பெருமானே அருள்புரியாய்' என்று வேண்டிப்பாடிய, இறைவனது திருவருள் நிறைந்த இப் பாடல்களை நன்கு பாட வல்லவர்க்குச் சிவலோகம் எளிய பொருளாய் விடும்.