முதன்மை பக்கம் » இலக்கியங்கள் » சைவ இலக்கியங்கள் » பன்னிரு திருமுறை » மூன்றாம் திருமுறை - தேவாரப் பதிகங்கள் » 3.041.திருவேகம்பம்
மூன்றாம் திருமுறை - தேவாரப் பதிகங்கள் - 3.041.திருவேகம்பம்
3.041.திருவேகம்பம்
பண் - கொல்லி
திருச்சிற்றம்பலம்
பண் - கொல்லி
திருச்சிற்றம்பலம்
இத்தலம் தொண்டைநாட்டிலுள்ளது.
சுவாமிபெயர் - ஏகாம்பரநாதர்.
தேவியார் - காமாட்சியம்மை.
3233 | கருவார்கச்சித், திருவேகம்பத் தொருவாவென்ன, மருவாவினையே |
3.041.1 |
யாவற்றுக்கும் கருப்பொருளாக விளங்கும் திருக்கச்சியேகம்பத்தில் வீற்றிருந்தருளும் ஒப்பற்ற சிவபெருமானைப் போற்றி வணங்க வினைவந்து சாராது.
3234 | மதியார்கச்சி, நதியேகம்பம் விதியாலேத்தப், பதியாவாரே |
3.041.2 |
மதி தவழும் மாடங்களையுடைய கச்சியில் கம்பை நதியின் கரையில் விளங்குகின்ற திருவேகம்பத்தைச் சிவாகம விதிப்படி அன்பர்கள் போற்றி வணங்கச் சிவகணங்களுக்குத் தலைமையாய் விளங்குவார்கள்.
3235 | கலியார்கச்சி, மலியேகம்பம் பலியாற்போற்ற, நலியாவினையே |
3.041.3 |
விழாக்கள் மலிந்து ஆரவாரத்துடன் எப்பொழுதும் விளங்கும் கச்சியில் வீற்றிருந்தருளுகின்ற திருவேகம்பநாதரைப் பூசைக்குரிய பொருள்களைக் கொண்டு பூசை செய்து போற்றி வழிபடத் தீவினையால் வரும் துன்பம் இல்லை.
3236 | வரமார்கச்சிப், புரமேகம்பம் பரவாவேத்த, விரவாவினையே |
3.041.4 |
தன்னை வழிபடும் அன்பர்களுக்கு வேண்டிய வரங்களை நல்கும் தெய்வத்தன்மையுடைய நகர் காஞ்சிபுரம் ஆகும். இத்திருத்தலத்தில் திருவேகம்பப் பெருமானை வணங்கிப் போற்ற வினை தொடராது நீங்கும் .
3237 | படமார்கச்சி, இடமேகம்பத் துடையாயென்ன, அடையாவினையே |
3.041.5 |
சித்திர வேலைப்பாடுகளையுடைய அழகிய கச்சியை இடமாகக் கொண்டு திருவேகம்பத்தில் வீற்றிருந்தருளும் இறைவன் எங்கள் தலைவனே என்று போற்ற வினை வந்து சாராது.
3238 | நலமார்கச்சி, நிலவேகம்பம் குலவாவேத்தக், கலவாவினையே |
3.041.6 |
நலம் தரும் கச்சிநகரில் விளங்குகின்ற திருவேகம்பத்தை அன்பால் அகமகிழ்ந்து போற்றி வணங்க வினை நீங்கும்.
3239 | கரியின்னுரியன், திருவேகம்பன் பெரியபுரமூன், றெரிசெய்தானே |
3.041.7 |
யானையின் தோலை உரித்துப் போர்த்துக் கொண்ட இறைவனான திருவேகம்பப் பெருமான், தேவர்களைத் துன்புறுத்திய அசுரர்கள் வாழ்ந்த மூன்றுபுரங்களையும் எரியுண்ணும்படி செய்தார்.
3240 | இலங்கையரசைத், துலங்கவூன்றும் நலங்கொள்கம்பன், இலங்குசரணே |
3.041.8 |
இலங்கை மன்னனான இராவணனைக் கயிலைமலையின் கீழ் நெரியுமாறு காற்பெருவிரலை ஊன்றி, அவன் நலத்தை அழித்த திருவேகம்பன் திருவடியைச் சரணடைதலே ஒளிமிக்க வாழ்விற்குரிய வழியாகும்.
3241 | மறையோனரியும், அறியாவனலன் நெறியேகம்பம், குறியாற்றொழுமே |
3.041.9 |
பிரமனும், திருமாலும் அறியமுடியாத வண்ணம் நெருப்பு மலையாய் நின்ற சிவபெருமான் கச்சியில் திருவேகம்ப நாதராக நெறியாகவும், போற்றித்தொழப் பெறும் குறியாகவும் உள்ளார்.
3242 | பறியாத்தேரர், நெறியில்கச்சிச் செறிகொள்கம்பம், குறுகுவோமே |
3.041.10 |
தலைமயிர் பறியாத புத்தர்களும், அது பறிக்கப்பட்ட சமணர்களும் கூறும் நெறியில் அமையாது, கச்சியில் ஞானம் பெருகும் திருவேகம்பநாதனின் திருக்கோயிலை அடைந்து வழிபடுவோமாக.
3243 | கொச்சைவேந்தன், கச்சிக்கம்பம் மெச்சுஞ்சொல்லை, நச்சும்புகழே |
3.041.11 |
கொச்சைவயம் என்னும் திருப்பெயருடைய சீகாழியில் அவதரித்த ஞானசம்பந்தன் திருக்கச்சியேகம்பத்தைப் போற்றிப்பாடிய இத்திருப்பதிகத்தை ஓதுபவர்கள் நிலைத்த புகழுடன் விளங்குவார்கள்.
திருச்சிற்றம்பலம்
‹‹ முன்புறம் | 1 | 2 | ... | 39 | 40 | 41 | 42 | 43 | ... | 124 | 125 | தொடர்ச்சி ›› |
தேடல் தொடர்பான தகவல்கள்:
திருவேகம்பம் - மூன்றாம் திருமுறை - தேவாரப் பதிகங்கள் - Panniru Thirumurai - பன்னிரு திருமுறை - Shaiva Literature's - சைவ இலக்கியங்கள் - போற்றி, கச்சியில், கொண்டு, விளங்குவார்கள், திருவேகம்பப், திருவேகம்பன், நீங்கும், விளங்குகின்ற, சாராது, திருமுறை, திருச்சிற்றம்பலம், விளங்கும், வீற்றிருந்தருளும், திருவேகம்பம்