திருப்புறவம் என்பது சீகாழிக்கொருபெயர். இத்தலம் சோழநாட்டிலுள்ளது.

சுவாமிபெயர் - பிரமபுரீசர்.
தேவியார் - திருநிலைநாயகி.

1047

எய்யாவென்றித் தானவரூர்மூன் றெரிசெய்த மையார்கண்டன் மாதுமைவைகுந் திருமேனிச் செய்யான் வெண்ணீறணிவான் றிகழ்பொற் பதிபோலும் பொய்யாநாவி னந்தணர்வாழும் புறவம்மே.

1.097.1

பொய் கூறாத நாவினை உடைய அந்தணர்கள் வாழும் திருப்புறவம் என்னும் சீகாழிப்பதி, இளையாத வெற்றியை உடைய அசுரர்களின் முப்புரங்களை எரித்த நீலகண்டன், உமையம்மையை ஒருகூறாகக் கொண்டு எழுந்தருளும், செய்ய திருமேனியனாய் வெண்ணீறு அணிந்தவனாய் விளங்கும் அழகிய பதியாகும்.

1048

மாதொருபாலு மாலொருபாலும் மகிழ்கின்ற நாதனென்றேத்து நம்பரன்வைகுந் நகர்போலும் மாதவிமேய வண்டிசைபாட மயிலாடப் போதலர்செம்பொன் புன்னைகொடுக்கும் புறவம்மே.

1.097.2

குருக்கத்தியில் மேவிய வண்டுகள் இசைபாடவும் மயில்கள் ஆடவும், அவற்றிற்குப் பரிசிலாகப் புன்னை மரங்கள் விரிந்த மலர்களின் மகரந்தங்களைப் பொன்னாக அளிக்கும் இயற்கைவளம் சான்ற புறவம் என்னும் பதி, உமையம்மையை ஒரு பாகமாகவும் திருமாலை ஒரு பாகமாகவும் கொண்டு மகிழ்கின்ற நம் மேலான தலைவன் வைகும் நகராகும்.

1049

வற்றாநதியும் மதியும் பொதியுஞ் சடைமேலே புற்றாரரவின் படமாடவுமிப் புவனிக்கோர் பற்றாயிடுமின் பலியென்றடைவார் பதிபோலும் பொற்றாமரையின் பொய்கைநிலாவும் புறவம்மே.

1.097.3

என்றும் நீர் வற்றாத கங்கையும், பிறையும் பொருந்திய சடையின்மேல் புற்றை இடமாகக் கொண்ட பாம்பு படத்துடன் ஆட, இவ்வுலகிற்கு ஒரு பற்றுக்கோடாகி, எனக்குப் பலி இடுமின் என்று பல ஊர்களுக்கும் செல்லும் சிவபிரானது பதி, அழகிய தாமரைகள் மலர்ந்துள்ள பொய்கை விளங்கும் புறவம் என்னும் பதியாகும்.

1050

துன்னார்புரமும் பிரமன்சிரமுந் துணிசெய்து மின்னார்சடைமே லரவும்மதியும் விளையாடப் பன்னாளிடுமின் பலியென்றடைவார் பதிபோலும் பொன்னார்புரிநூ லந்தணர்வாழும் புறவம்மே.

1.097.4

பகைவர்களாகிய திரிபுர அசுரர்களின் முப்புரங்களையும், பிரமனின் தலைகளில் ஒன்றையும் அழித்து, மின்னல் போல் ஒளி விடும் சடைமுடி மேல் பாம்பும் மதியும் பகை நீங்கி விளையாடுமாறு சூடிப் பல நாள்களும் சென்று பலியிடுமின் என்று கூறித் திரிவானாகிய சிவபிரானது பதி, பொன்னாலியன்ற முப்புரி நூலை அணிந்த அந்தணர்கள் வாழும் புறவமாகும்.

1051

தேவாவரனே சரணென்றிமையோர் திசைதோறுங் காவாயென்று வந்தடையக்கார் விடமுண்டு பாவார்மறையும் பயில்வோருறையும் பதிபோலும் பூவார்கோலச் சோலைசுலாவும் புறவம்மே.

1.097.5

பாற்கடலைக் கடைந்தபோது எழுந்த விடத்தின் கொடுமை தாங்காது, தேவர்கள் திசைதோறும் சூழ்ந்து நின்று தேவனே! அரனே! உனக்கு அடைக்கலம் எங்களைக் காவாய் எனச் சரண் அடைய, அக்கடலில் தோன்றிய கரிய விடத்தை உண்டு, பாடல்களாக அமைந்த வேதங்களைப் பயிலும் சிவபெருமான் வாழும் பதி, மலர்கள் நிறைந்த அழகிய சோலைகள் சூழ்ந்த புறவம் என்னும் பதியாகும்.

1052

கற்றறிவெய்திக் காமன்முன்னாகும் முகவெல்லாம் அற்றர னேநின் னடிசரணென்னு மடியோர்க்குப் பற்றதுவாய பாசுபதன்சேர் பதியென்பர் பொற்றிகழ்மாடத் தொளிகள் நிலாவும் புறவம்மே.

1.097.6

மெய்ந்நூல்களைக் கற்று, அதனால் நல்லறிவும் பெற்று, காமனாகிய மன்மதனின் குறிப்பினால் ஆகும் காமவிருப்பமெல்லாம் அற்று, அரனே! நின் திருவடிகளே சரண் என்று கூறும் அடியவர்கட்குப் பற்றுக்கோடாய்ப் பாசுபதன் எழுந்தருளிய பதி, பொன் நிறைந்து விளங்கும் மாடவீடுகளின் ஒளி சூழ்ந்த புறவம் என்னும் பதியாகும் என்பர்.

1053

எண்டிசையோரஞ் சிடுவகைகார்சேர் வரையென்னக் கொண்டெழுகோல முகில்போற்பெரிய கரிதன்னைப் பண்டுரிசெய்தோன் பாவனைசெய்யும் பதியென்பர் புண்டரிகத்தோன் போன்மறையோர்சேர் புறவம்மே.

1.097.7

எண்திசையில் உள்ளாரும் அஞ்சிடுமாறு கரிய மலைபோலவும், நீரை முகந்து கொண்டெழுந்த அழகிய கரிய மேகம் போலவும் வந்த பெரிய களிற்று யானையை முற்காலத்தில் கொன்று அதன் தோலை உரித்துப் போர்த்த சிவபிரான் விரும்பியிருக்கும் பதி,தாமரை மலர் மேல் உறையும் நான்முகன் போல வேதங்களில் வல்ல அந்தணர்கள் வாழும் புறவமாகும்.

1054

பரக்குந்தொல்சீர்த் தேவர்கள்சேனைப் பௌவத்தைத் துரக்குஞ்செந்தீப் போலமர்செய்யுந் தொழின்மேவும் அரக்கன்றிண்டோ ளழிவித்தானக் காலத்திற் புரக்கும்வேந்தன் சேர்தருமூதூர் புறவம்மே.

1.097.8

எங்கும் பரவிய பழமையான புகழை உடைய தேவர்களின் கடல் போன்ற படையை, ஊழித் தீப் போன்று அழிக்கும் தொழிலில் வல்ல இராவணனின் வலிய தோள் வலியை அக்காலத்தில் அழித்தருளி, அனைத்து உலகங்களையும் புரந்தருளும் வேந்தனாக விளங்கும் சிவபிரான் எழுந்தருளிய பழமையான ஊர் புறவமாகும்.

1055

மீத்திகழண்டந் தந்தயனோடு மிகுமாலும் மூர்த்தியை நாடிக் காணவொணாது முயல்விட்டாங் கேத்தவெளிப்பா டெய்தியவன்ற னிடமென்பர் பூத்திகழ்சோலைத் தென்றலுலாவும் புறவம்மே.

1.097.9

மேலானதாக விளங்கும் உலகங்களைப் படைத்த பிரமனும், புகழால் மேம்பட்ட திருமாலும் அழலுருவாய் வெளிப்பட்ட சிவமூர்த்தியின் அடிமுடிகளைக்காண இயலாது தமது முயற்சியைக் கைவிட்டு ஏத்த, அவர்கட்குக் காட்சி தந்தருளிய சிவபிரானது இடம், மலர்கள் நிறைந்த சோலைகளில் தென்றல் வந்து உலாவும் புறவமாகும்.

1056

வையகநீர்தீ வாயுவும்விண்ணும் முதலானான் மெய்யலதேர ருண்டிலையென்றே நின்றேதங் கையினிலுண்போர் காணவொணாதான் நகரென்பர் பொய்யகமில்லாப் பூசுரர்வாழும் புறவம்மே.

1.097.10

மண், நீர், தீ, காற்று, விண் ஆகிய ஐம்பூதங்களில் நிறைந்து, அவற்றின் முதலாக விளங்கும் இறைவனாய், உண்மையல்லாதவற்றைப் பேசி உண்டு இல்லை என்ற உரைகளால் அத்தி நாத்தி எனக் கூறிக் கொண்டு தம் கைகளில் உணவேற்று உண்போராய சமணரும், புத்தரும் காண ஒண்ணாத சிவபிரானின் நகர், நெஞ்சிலும் பொய்யறியாத பூசுரர் வாழும் புறவமாகும்.

1057

பொன்னியம்மாடப் புரிசைநிலாவும் புறவத்து மன்னியவீசன் சேவடிநாளும் பணிகின்ற தன்னியல்பில்லாச் சண்பையர்கோன்சீர்ச் சம்பந்தன் இன்னிசையீரைந் தேத்தவல்லோர்கட் கிடர்போமே.

1.097.11

பொன்னால் இயன்ற மாடங்களின் மதில்கள் சூழ்ந்த, புறவம் என்னும் பதியில் நிலைபெற்று விளங்கும் சிவபிரானின் சேவடிகளை, நாள்தோறும் பணிந்து, சீவபோதம் அற்றுச் சிவபோதம் உடையவனாய்ப் போற்றும் சண்பையர் தலைவனாகிய புகழ்மிக்க ஞானசம்பந்தன், இன்னிசையோடு பாடிய இப்பதிகப் பாடல்கள் பத்தையும் பாடி ஏத்தவல்லவர்கட்கு, இடர் போகும்.