இனமயில் அகவு மரம்பயில் கானத்து நரைமுக ஊகம் பார்ப்பொடு பனிப்பப் படுமழை பொழிந்த சாரலவர் நாட்டுக் குன்ற நோக்கினென் தோழி பண்டை யற்றோ கண்டிசின் நுதலே.	5
- கபிலர்.

தோழி! திரளாக உள்ள மயில்கள் ஆரவாரிக்கும் மரங்கள் செறிந்த காட்டிடத்தில் வெள்ளை முகத்தை உடைய கருங்குரங்கு குட்டிகளோடு குளிரால் நடுங்கும்படி ஒலிக்கின்ற மழை பொழிந்த மலைச் சாரலை உடைய அத் தலைவரது நாட்டில் உள்ள குன்றத்தை பார்த்தேன்; அதனால் ஒளி இழந்து பசப்பூர்ந்த என் நெற்றி பசப்பூராத பழைய தன்மை உடைய தாயிற்றோ? பார்ப்பாயாக.

முடிபு: தோழி, அவர் நாட்டுக் குன்றம் தோக்கினென்; நுதல் பண்டையற்றோ? கண்டிசின்.    

கருத்து: தலைவருடைய குன்றத்தை நோக்கி ஆற்றி இருப்பேன்.