பல்லோர் துஞ்சு நள்ளென் யாமத் துரவுக்களிறு போல்வந் திரவுக்கதவு முயறல் கேளே மல்லேங் கேட்டனெம் பெரும ஓரி முருங்கப் பீலி சாய நன்மயில் வலைப்பட் டாங்கியாம்	5
உயங்குதொறு முயங்கும் அறனில் யாயே.
- கண்ணனார்.

தலைவ ஊரில் உள்ளார் பலரும் துயிலும் இருள் செறிந்த இடையிரவின் கண் வலியைஉடைய களிற்றைப் போல வந்து இராக் காலத்தே தாழிட்ட கதவைத் திறக்க முயன்றதனால் உண்டான ஒலியை யாம் கேளேம் அல்லேம்; கேட்டேம்; தலைக்கொண்டை சிதைய தோகை மெலிய நல்ல மயில் வலையின் கண்ணே அகப் பட்டாற் போல யாம் வருந்துந் தோறும் மறமிக்கதாய் எம்மைத் தழுவுவாள்; அதனால் நின் குறிப்பறிந்து நின்பால் வர இயலவில்லை.

முடிபு: பெரும, கதவம் முயறல் கேளேம் அல்லேம்; கேட்டனம்;யாய் முயங்கும்.    

கருத்து: காவல் மிகுதியால் நின்னைத் தலைவி காண்டல் அரிதாதலின் வரைந்து கோடலே நலம்.