மலையிடை யிட்ட நாட்டரு மல்லர் மரந்தலை தோன்றா ஊரரு மல்லர் கண்ணிற் காண நண்ணுவழி யிருந்தும் கடவுள் நண்ணிய பாலோர் போல ஒரீஇ ஒழுகும் என்னைக்குப்	5
பரியலென் மன்யான் பண்டொரு காலே.
- நெடும் பல்லியத்தனார்.

தோழி! தலைவர் மலைகள் இடையிடுவதனாற் சேயதாகிய நாட்டினருமல்லர்; தன்னிடத்துள்ளமரங்கள் நமக்குத் தோன்றாத சேய்மையிலுள்ள ஊரினரும்அல்லர்; கண்ணாலே காணும்படி விரைவில் வருதற்குரிய அணிமையிடத்திலிருந்தும் முனிவரைஅணுகி வாழும் பகுதியினரைப்போல மனத்தால் நீங்கி ஒழுகுகின்ற என் தலைவர்பொருட்டு யான்! முன்பு ஒரு சமயத்தில் பரிதலையுடை யேனாயினேன்; அஃதுஇப்பொழுது கழிந்ததே!

முடிபு: நாட்டரு மல்லர்; ஊரரும் அல்லர்; நண்ணுவழியிருந்தும்ஒரீஇயொழுகும் என்னைக்குப் பண்டொருகால் யான் பரியலென்மன்.    

கருத்து:இப்பொழுது என்னைப் புறக்கணித் தொழுகும்தலைவர்பால் யான் முன்பு பரிவுடையளாக இருந்தேன்.