மராட்டியரின் பரவிவரும் செல்வாக்கை ஒடுக்கும் நோக்கத்துடன் அவுரங்கசீப் பீஜப்பூர், கோல்கொண்டா மீது படையெடுத்தார். பீஜப்பூர் சுல்தான் சிக்கந்தர் ஷாவை முறியடித்து அப்பகுதியை இணைத்துக் கொண்டார். பின்னர் கோல்கொண்டா மீது தாக்குதல் தொடுத்து குதுப்ஷாணி மரபை பூண்டோடு அழித்து அந்த அரசையும் இணைத்துக் கொண்டார். தக்காண அரசுகளை அழித்தது அவுரங்கசீப்பின் மாபெறும் அரசியல் தவறாகும். முகலாயருக்கும் மராட்டியருக்கும் இடைப்படு நாடாக அவை இருந்தன.

அவுரங்கசீப்பின் நடவடிக்கை முகலாயருக்கும், மராட்டியருக்கும் இடையே நேரடி மோதல் உருவாக வழிவகுத்தது. மேலும் அவரது தக்காணப்படையெடுப்புகள் முகலாய கருவூலத்தை காலிசெய்தன. ஜே.என். சர்க்காரின் கூற்றுப்படி தக்காணக் குடற்புண் அவுரங்கசீப்பை அழித்தது.

சமயக் கொள்கை

அவுரங்கசீப் தனது தனிப்பட்ட வாழ்க்கையில் ஒரு வைதீக முஸ்லீமாகத் திகழ்ந்தார். இந்தியாவை ஒரு இஸ்லாமிய அரசாக மாற்றியமைப்பதே அவரது கொள்கை. ஒழுக்கநெறிகளை நடைமுறைப் படுத்துவதற்கென முதாசீபுகள் என்ற உயர் அதிகாரம் படைத்த அதிகாரிகளைக் கொண்ட ஒரு தனித் துறையை அவுரங்கசீப் ஏற்படுத்தினார். மது அருந்துவது தடை'செய்யப்பட்டது. பாங்க் என்ற தாவரம் பயிரிடுவதும், பயன்படுத்துவதும் பிற போதைப் பொருட்களும் தடைசெய்யப்பட்டன. முகலாய அரசவையில் இசை தவிர்க்கப்பட்டது. தரோக்கா தர்ஷன் என்ற பேரரசர் மணிமாடத்தில் மக்கள் முன்தோன்றும் சடங்கையும் அவர் விட்டொழித்தார். தசரா விழாவுக்கும் தடைவிதிக்கப்பட்டது. அரசவையிலிருந்த வானஇயல் மற்றும் ஜோதிடக்கலை அறிஞர்கள் பதவிநீக்கம் செய்யப்பட்டனர்.

---